Urui e Utrì (IV)

Urui quann’era nicu era na lastima, iucava rausu. Ogni cristianu addivintava u so iucattulu: a unu lu pigghiava pi sceccu, a n’autru c’acchianava ‘nta l’immu, cu navutru iucava o mafiusu. Pi tinillu bonu c’accattaru na dondola di lignu nivuru, ca s’addumava quannu ca s’annacava. E s’annacava di sira e di matina; iddu, cuntintuni, abbanniava ammugghiatu nna faredda. E s’annacava tantu ca si scurciava nne cosci, russi ca parianu ciuri d’arofalo. Quann’era beddu vunciu, isava la iamma sicca Urui ca nun si capia cchiù chi nummaru era. Quann’era sbunciu turnava ca iamma ritta e a testa arrivutata. Suvirchiusu.
All’annu ci pigghiaru un cavaddu veru, ca truscia appizzata nno ciancu. Urui su taliava ca ci squagghiava ntà l’occhi. Ci parrò nell’aricchia pi dirici ca iddu era u so re, viscottu e minè, piripi e piripè. U cavaddu capiu e si calò appanzanterra. Urui s’appuiò, s’allavancò e s’assistimò; ma quannu iu pi mettiri u peri ntà staffa un ci potti trasiri pi quantu era arrivutata la iamma so. “Noni, noni” ittava vuci; però scinnia e canciava iocu.