Urui e Utrì (V)

Assittatu nna tavula cunsata, attruvava ogni ricchizza e beniddiu. Avanti i manciari s’arricriava ‘nta tuttu ddu ciavuru, ca l’attigghiava prima nna vucca e doppu nna panza. Pigghiava u cucchiaruni e l’inchiva di suppa, a furchetta e l’azziccava nna fedda arrustuta, muzzicava e macicava,
viveva e sucava, sempri cu vuccuni mmucca, a mascidda china l’occhi calati e a panza vunchia. Urui criscia di rintra e di fora, di supra e di sutta; chi maravigghia; e nta tuttu lu regnu si ittavanu sti vuci: “miraculu, miraculu”, “Urui si vunchia”, “…ca vunchia pi mortipricazione”. Du voti tantu, tri boti tantu, cincu voti tantu; nta nenti si fici pacchiuni e beddu cumnminatu, tantu ca prestu c’acchianò disiu di fimmina.
Surava tutta la santa iurnata, finta ca sinteva cavuru mentri ca sutta sutta era sbrugghiatu. Dipoi ca scurava, si mitteva darreri ogni picciotta ca vireva. Sa ciarava. Sa taliava ri capiddi infin’i scarpi. Taliava i spaddi tunni, u culu a panaru, i iammi lisci e i peri leggi. Si ci l’avia accussì comu vulia, accuminciava a azziccari; asinnò canciava strata.