Urui e Utrì (VII)

Ureci erun pezzi fitusu. Mala rrinisciutu, paria narresca e longha longha. A nasca ci sciddicava nsino viddricu. Peri nnavia nenti ca stava aggritta pun cariri. Putia scuppari nterra e farisi malurànne, tantu ca so matri c’arrialò na basi p’appuiarisi; ca iddu nticchia sa mittia e nticchia sa niscia. Nnastàti so matri su carrià nno vuscu pi fallu ciatari macari, p’allascarici i naschi e macari fallu crisciri. Iddu si curcava sutta l’arburi, si stricava nterra, si turceva mmenz ipitruna. Ipitruna? Sissi. Manciava scravagghi abbirmati, irbazza fràricia e babbaluci attruvati. Vuatri ca liggiti stati pinsannu: ma picchì nni rici sti cosi? Picchì, rispunnu iò, doppu manciari vulia viviri e ppi biviri avia a truvari l’acqua e acqua cci nnera sulu nto ciumi. Acqua frisca e spicchianti; ca quannu s’avia affari na vivutedda si viria dda cosa longha comm’era. Urei si vitti siccu e birticali, a nasca nsinu o viddicu, lariu cumminatu. So matri taliava e chianceva; matri di li nùmmari. So figghiu si ssì taliava si mitteva a buciari «Ma picchì, buttana ra pinna?». Na matina ci rissi a so matri «Mamà, vulissi un fratuzzu» e so mà cha s’avia finutu tutti li nùmmari, ci resi lu zeru pi cumpagneddu, ca mancu nùmmaru paria tunnu comera. Accussì nasciu Ureci, i peggio nummari accucchiati assemmola.